ឥណ្ឌា៖ ប្រទេសឥណ្ឌាបានធ្វើការកុម្ម៉ង់បញ្ជាទិញនូវវ៉ាក់សាំងគ្មានឈ្មោះ និងគ្មានការទទួលស្គាល់ពីអង្គការសុខភាពពិភពលោក ដែលកំពុងធ្វើការតាមដាននិងអភិវឌ្ឍន៍ដោយមន្ទីរពិសោធន៍ក្នុងស្រុកមួយឈ្មោះ Biological E ចំនួន ៣០០លានដូស ខណៈរដ្ឋាភិបាលបានអះអាងក្នុងសេចក្តីថ្លែងការមួយថា វ៉ាក់សាំងនេះកំពុងស្ថិតក្នុងការធ្វើតេស្តសាកល្បងដំណាក់កាលទី៣ ហើយឆ្លងកាត់់ការធ្វើតេស្តពីរលើកកន្លងមក បានបង្ហាញឱ្យឃើញនូវលទ្ធផលល្អប្រសើរគួរឱ្យទុកចិត្តមួយ។ 

បញ្ជាក់ឱ្យដឹងដែរថា ស្ថិតក្នុងអំឡុងពេលវ៉ាក់សាំងនៅក្នុងដំណាក់កាលសិក្សាពិសោធន៍នេះ ឥណ្ឌាបានចំណាយលុយកក់ និងកុម្ម៉ង់ចំនួន ២០៦លានដុល្លារអាមេរិករួចទៅហើយ បើទោះបីមិនទាន់មានការប្រកាសទទួលស្គាល់ណាមួយដោយអង្គការសុខភាពពិភពលោកក្តី។

គិតមកដល់ពេលនេះ ឥណ្ឌាបានចុះបញ្ជីក្នុងការផ្តល់វ៉ាក់សាំងឱ្យប្រជាជនបានត្រឹមតែជាង ២២០លានដូសប៉ុណ្ណោះ ខណៈចំនួនប្រជាជនសរុបមានដល់ទៅជាង ១,៤ពាន់់់លាននាក់ដែលទាមទារឱ្យមានតម្រូវការចាក់វ៉ាក់សាំង ហើយបើតាមប្រភពនានាជាច្រើនបានចុះផ្សាយថា មានប្រជាជនមិនដល់ ១០ភាគរយផងដែលទទួលបានវ៉ាក់សាំងដូសទី១ ខណៈបញ្ហានេះកើតមានពីវិបត្តិកង្វះការផ្គត់ផ្គង់វ៉ាក់សាំងនៅក្នុងប្រទេស។

មួយរយៈក្រោយនេះ តួលេខនៃចំនួនអ្នកឆ្លងកូវីដ-១៩នៅឥណ្ឌាហាក់មានការថយចុះ ប៉ុន្តែក៏ស្ថិតក្នុងកម្រិតគួរឱ្យព្រួយបារម្ភរហូតដល់លើសពី ១០០,០០០នាក់ក្នុងមួយថ្ងៃ ខណៈអ្នកស្លាប់ដោយសារកូវីដត្រូវបានគេរាយការណ៍ថាមានចំនួនជាង ៣៤០,០០០នាក់ហើយ។ យ៉ាងណាក្តី ប្រភពពីអ្នកតាមដានបានអះអាងថា ចំនួនអ្នកស្លាប់មានការប៉ាន់ស្មានខ្ពស់ជាងនេះឆ្ងាយណាស់នៅក្នុងប្រទេសឥណ្ឌា។ 

រដ្ឋាភិបាលឥណ្ឌាដែលដឹកនាំដោយលោកនាយករដ្ឋមន្រ្តី Narendra Modi​ ត្រូវបានគេរិះគន់ចំៗ និងវាយប្រហារធ្ងន់ៗជុំវិញបញ្ហាអសមត្ថភាពក្នុងការគ្រប់គ្រងវិបត្តិកូវីឌ-១៩ក្នុងប្រទេស រួមទាំងបញ្ហាវិបត្តិវ៉ាក់សាំងនេះផ្ទាល់តែម្តង។ នៅឥណ្ឌា មានការប្រើប្រាស់់នូវវ៉ាក់សាំងចំនួន ៣ប្រភេទរួមមាន កម្មវិធី COVISHIELD ផលិតដោយវិទ្យាស្ថានសេរ៉ូមនៃប្រទេសឥណ្ឌា SII , វ៉ាក់សាំង COVAXIN និង Sputnik V របស់រុស្សីជាដើម ប៉ុន្តែវ៉ាក់សាំងទាំងអស់នេះត្រូវបានផលិត និងនាំចូលបានសរុបតែត្រឹម ៣៥០លានដូសប៉ុណ្ណោះក្នុងរយៈពេលជាង ៥ខែពីខែមករា ដល់ខែឧសភា ឆ្នាំ២០២១៕

ប្រភព : CBC NEW